طرق لأكتساب عادة القراءة

" طرق لأكتساب عادة القراءة "

حبيت اكتب عن دا الموضوع لانو انا كنت اعاني جدا منو 

كنت ازا اشتريت كتاب اكتر من 300 صفحة يقعد معايا شهر لين ما اخلصو 

و بعد دي الطرق الحمدلله قدرت اني اجتاز دا الشيء

فأتمنى انو هذي الطرق تفيدكم 

1- خدي الكتاب معاكي فين ما رحتي حتى لو مول او رايحة عند احد 

اقرأي في الطريق ، الطريق مرا فرصة .. وقت طويل نقدري نستفيد منو بالقراءة 

2- يومياََ خصصي وقت للقراءة لو نص ساعة كل يوم او قبل النوم 

3- لا تضغطي على نفسك في الكتاب ازا ما عجبك جدا عادي 

سيبيه و روحي لكتاب غيرو يمكن دا الكتاب مو نوعك المفضل من الكتب 

و صدقيني ما حتعرفي نوعك المفضل من الكتب الا ازا جربتي تقرأي كتير انواع من الكتب

 وقتها الكتاب الي تستمتعي فيه يكون هوا دا نوعك المفضل من الكتب  

اما اذا كان الكتاب عاجبك بس تحسي انو عندك خمول قرأي ممكن انك تسيبيه و تروحي تقرأي 

شي تاني يحمس اكتر يزيح دا الخمول و بعدين ترجعي للكتاب الاول 

4- اجلسي في مكان مريح .. زبطي جلستك شغلي شموع سوي قهوة و اقعد استرخي و اقرأي الكتاب 

5- اذا انتي من النوع الي مرا ما يحب يقرأ كتب ممكن انك تسمعي كتب صوتيه مليان مرا في النت 

6 - السوشل ميدا مرا حتساعدك في دا الموضوع .. ضيفي ناس يحفزوكي على القراءة في السناب 

في الانستغرام في اليوتيوب مرا دا الشيء انا استفدت منو كتير

7- ابحثي عن الكتاب الي تبي تقرأيه ، لانو اول ما حتبحثي صدقيني حتتحمسي مرا انك تقرأيه 

8- لا تحطي اعذار لنفسك زي " ما عندي وقت اقرأ كتاب " صدقيني لو شفتي يومك من البداية للنهاية الا ما يكون في ساعة 

او نص ساعة ما بتسوي شي بس ماسكة الجوال .. احس الجوال مرا ياكل وقتنا اكل و نحنا ما نحس 

فركزو على ايش بتسوو و صدقوني حتلاقو وقت للقراءة 

.

.

هذي الطرق الي انا سويتها شخصياً لأكتساب عادة القراءة 

لو عندكم طرق تانية جدا حكون سعيدة بقرأتها في خانه التعليقات تحت

و اتمنى انكم تكونو استفدتو و شكرا