القصص الانجليزية التعليميه

مرحبا 

زي ما وعدتكم اني حكتبلكم تدوينة عن هذي الكتب التعليميه

هيا عبارة عن روايات او قصص قصيرة 

 انا اخدتها ن جرير الوحدة ب 35 ريال 

فيها 6 مستويات تبدأي على حسب لغتك 

ازا لغتك لسا في البداية  تقدري تبداي من مستوى starter 

 تقرأي كم قصة لين ما تحسيها صارت سهله عليكي

بعدين المستوى رقم 1 بعدين 2 و بعدين 3 و كهذا

و كل مالها تصعب الكلمات و القرامر يصير اصعب 

بس في النهاية طريقة تعليمية بشكل حلو 

كانك بتقرأي رواية بس بتتعلمي بنفس الوقت 

و القصص في المستوى الواحد مرا مليان في كثير قصص تقدري تختاري القصة الي تعجبك

.

.

على طرف الروية يكون مكتوب المستوى زي كدا 

.

.

.

زي كدا يكون مستوى starter

فيه صور كثير القرامر سهل 

الكلمات سهله يكون بس 250 كلمة 

يكون القرامر عبارة عن 

present simple - present continuous - imperative -can /cannot , must - going to - simple gerunds 

.

.

.

.

بعدين كل ما طلعتي مستوى اعلى 

يكثر الكلام و يصعب القرامر و تقل الصور 

في المستوى الاول يكون 400 كلمة 

و التاني 700

و الثالث 1000

و الرابع 1400

و الخامس 1800

و السادس 2500

و مع كل مستوى صدقوني حتلاقو نفسكم بتطورو 

و نصيحة اذا في كلمة ما عرفتو تقرأوها او ما عرفتو معناها 

لا تترجموها على طول حاولو تخلصو الجملة او السطر 

اكيد حتكونو فهمتوها اذا فهمتوها بعدين ترجموها و اتأكدو من ترجمتكم لها 

.

.

.

مع كل رواية يجي معاها سي دي تكون جواتو نفس الرواية بس بصوت

عشان ممكن بعد ما تقرأيها تسمعيها و تشوفي ازا في كلمات نطقتيها بشكل غلط 

في بعضها يجي معاها سي دي واحد و في بعضها 2 و في بعضها 3 يختلف 

.

.

.

و الحلو فيها كمان في اسئلة تكون قبل القراءة و اثناء القراءة و بعد القراءة 

عشان كمان تتعلمي كيف تجاوبي على الاسئلة و يعني تفهمي الرواية اكثر 

.

.

.

كمان في نهاية كل رواية في glossary

يعني زي الكلمات الجديدة او القاموس شي زي كدا 

يحطلك الكلمات الجديدة في دي الرواية مع معناها 

.

.

.

هذولاة افضل 3 روايات استمتعت جدا في قرأتهم 

dracula 

دي قصة فمباير او مصاص دماء اسمو دراكولا 

هذي القصة في المستوى التاني 

the secret garden 

هذي قصة تتكلم عن فتاة صغيرة كانت عايشة في ترف بعدين اهلها ماتو و راحت عاشت عند خالها 

و خالها كان من النوع الشديد الي ما يعطي وجه فكانت تحاول تسلي نفسها في الحديقة وتلعب و تتعلم الزراعة 

لين بعد فترة اكتشفت انو في حديقة سرية و هنا تبدأ الحبكة 

هذي القصة في المستوى الثالث

martin luther king 

تتكلم عن الملك الي مشهور في جملتو الي هيا " i have a dream "

و تتكلم عن ايام العنصرية في امريكا و كيف كانو يعاملو الناس السمر 

هذي القصة في المستوى الثالث برضو 

.

.

.

في النهاية حابة اقلكم 

انو ما في شي سهل 

لا تقولي ما حقدر اتعلم انجليزي الانجليزي شي صعب 

اذا انتي شفتيه صعب حتقنعي نفسك انو صعب و في حياتك ما حتقدري تتعلميه 

بس اذا انتي شفتيه انو شي سهل و حاولتي تقنعي نفسك انو سهل

حتحسيه شي جدا ممتع حتى و انتي بتتعلميه 

في كثير طرق عشان تكتسبي اللغه 

انا كنت صراحة اخاف اني اشتري كتاب انجليزي لاني كنت اقول لنفسي 

اني ما حقدر اقرأه 

بس كسرت حاجز الخوف هذا 

و رحت و اشتريت كتب انجليزية و اكتشفت اني اقدر 

صح كان صعب في البداية بس كسرت حاجز الخوف و بدأت اتعلم 

  و اقرأ و احاول اتكلم 

" تعلم فليسَ المرءُ يولدُ عالماً"

و في النهاية جدا اشكركم على حماسكم معايا 

في التدوين و اتمنى اسمع ارائكم عن هذي التدوينة في حساباتي