my planner 📒🍃

السلام عليكم 🙋🏼
كثير منكم طلبو مني اتكلم على البلانر حقي
اول شي فكرة البلانر هو عبارة عن اوراق يومية و اسبوعية و شهرية
تخططي فيها و تكتبي ايش تبي تسوي او ايش حابة تعملي
و ايش اهدافك لهذي السنة او لهذا الشهر او الاسبوع او اليوم
 او ايش عندك في هذا  الشهر او الاسبوع {عزيمة، حفلة، موعد دكتور}
عشان ما يضيع وقتك على الفاضي و تنسي مواعيدك و الاشياء الي لازم تسويها
جداََ ممتع و مفيد للأشخاص الي دايماََ يحسو الوقت بيمشي و مهم قادرين يسوو شي  او للي ينسو كثير
البلانر يخططلك يومك و ينظمو👌🏽✨
هذا البلانر حقي من برا📒💖

جدا عادي و بسيط بس حبيتو لانو اقدر ازيد فيلو اوراق
حجمو A6
صغير بس عجبني حجمو عشان اقدر احطو في شنطة يدي و اخذو معايا اي مكان 
و دا الشي الاصفر انا سويتو و هذي طريقتو

جدا سهله و بسيطة
و اذا ما حبيتها في ناس يعلقو ميداليات في ناس ما يحطو شي.. يعني البلانر حقك زينيه زي ما تحبي 💜
.
.
نجي لمحتوى البلانر
البلانر حقي جاه معاه هذي الاوراق
دي الاوراق الشهرية 

 و هذي الاسبوعية

 و هذي الاوراق لارقام الهاتف

 و هذا جدول سنوي

انا صراحة ما عجبتني و حسيت كلها مساحتها صغيرة ما تناسبني 
خرجتهم كلهم من البلانر و طبعت اوراق من عندي
دخلت موقع اسمو pinterest
في خانة البحث كتبت free printables planner
و لاقيت اشكال و انواع 😍😂
اخترت الاشياء الي عجبتني و طبعتها و قصيتها و حطيتها في البلانر
دا الجدول الشهري الي عجبني

حبيتو لانو الخانة شويا واسعة اقدر اكتب فيها و انا اقدر ازينو و احط ستيكرز و الوان
احط ورقة فاضية ورا هذا الجدول و اكتب فيها اهدافي لهذا الشهر
.
.
و دا الجدول الاسبوعي
كمان حبيتو عشانو واسع و فاضي كدا اخد راحتي في التزين و الكتابة 😂💕
و انا شخصياََ استعمل الجدول الاسبوعي اكتر شي ما احب استعمل الجدول اليومي
طريقتي كل يوم قبل ما انام اكتب ايش ابغا اسوي بكرا
و بكذا اصحى اليوم التاني و اسوي الاشياء الي كتبتها

و كمان احط في الجدول الاسبوعي لستة
اكتب فيها الاشياء الي ابغا اسويها في هذا الاسبوع 
و بكذا كل يوم اسوي شي منها

كدا تقريباََ ارتب البلانر حقي
و برضو جدول متابعة شرب الموية من موقع pinterest
انا بس طبعت و قصيت
و كمان احب احط كلام متفائل او أدعية او اقتباسات  ✨

دا برضو من موقع pinterest
دا عبارة عن جدول المصاريف 💸
الجدول الكبير للمصاريف
و الصغير للدخل

و دا جدول العادات الشهري
اذا عندك عادة حابة تكتسبيها ممكن تكتبيها هنا و كل يوم تشوفي ازا بتسويها او لا
تظللي اذا سويتها و تسيبي الخانة فاضية اذا ما سويتها 

و دا جدول متابعة الدرامات
دا اتوقع اكتر شي حيعجبكم 😂
تكتبي المسلسل و عدد الحلقات
دا مو شي مهم  بس حلو للناس الي تبا تشوف كم مسلسل اتفرجت نهاية السنة

نجي للفواصل
كل الفواصل دي انا مسويتها
الخلفية الي ورا انا ملونتها بألوان مائية
و الصورة الي فوق دي طبعتها
و حطيت ورقة و كتبت planner

عاملة في البلانر حقي كثير اقسام و منها دا القسم
هنا الاشياء الي لازم اتتبعها يومياََ او اسبوعيآَ
مثلاََ المصاريف ، سقاية النبات ، المسلسلات و كدا

هنا نجي لقسمي المفضل الكتب 💜
الورقة دي كمان انا سويتها الشريط الاحمر و الاورنج و الاصفر دولا شرايط لصق اشتريتهم من جرير
و الورقة اللي على شكل برتقال كانت عني من زمان قصيتها و حطيتها على الطرفين
و كلمة books دولا ستيكرز اشتريتهم من جرير
في دا القسم اكتب :
1- الكتب الي ابغا اشتريها
2- الكتب الي قرأتها دي السنة مع تقيمي للكتاب
3- مسوية زي الجدول اكتب فيلو اسم الكتاب الي بقرأو حالياََ و احط هدف متى اخلصو و اكتب متى بدأتو و متى خلصتو
و اكتب رأي في الكتاب

و كمان طابعة تحدي القائمة ، عارفة انو خلصت من زمان بس انا كدا طابعتها لنفسي 😂
حبيت اطبعها لانها حتحمسني اقرأ اكثر و تحمسني اقرأ كتب منوعة غير نوعية الكتب الي دايمآَ اقرأها 

و دا القسم تقريباََ قسم الشخاميط 😂✏️

و دا اخر قسم دخلتو في البلانر
هوا عن البيوتي
اكتب فيلو الماسكات الي عجبتني و الخلطات
 

و بس في الجيوب حقت البلانر طابعة صور عجبتني ، لحظات حلوة ، كلام عجبني
و حاطه دولاة الوحوش الاتنين الي ما اعرف ايش اسمهم 😂👾👹
برضو اخذتهم من جرير

.
.
في النهاية حابة اقول قد ايش البلانر خلاني اسوي اشياء دايماََ اقول ابا اسويها و اسحب 😂
و ترا مو شرط انك تسوي بلانرك زيي كل واحد يسوي البلانر حقو على الطريقة اللي يرتاح عليها  مالو شروط ولا قوانين
اذا حابة تبدعي فيلو ابدعي و اذا منك حابة لا تزينية ولا تسوي شي
هوا الفايدة منو انو يرتبلك وقتك 👌🏽
اللي قرأ دي التدوينة و عجبتو حطولي دولا الايموجي في صفحتي في الانستغرام خلوني اشوفكم {📒🍃}
الي عندو بلانر حطولي تاق خلوني اشوف ابداعاتكم فيه😍💖
و اللي سألوني من فين اشتريتو
من دا المتجرsnowshopp
 و ممكن تلاقوه في متجر علي اكسبرس
سعرو تقريباً 120 و في متجر علي سعرو اقل يمكن 55
حطيتلكم الروابط عشان يسهل عليكم 💕
اتمنى انكم تكونو استفدتو 🙊💜
 و شكرا جداَ لكم 💕